నిమ్నగలా...

నిమ్నగలా నెమ్మదిగా ప్రవహించే ఈ మౌనం
ఎన్ని కలల కావ్యాలను ఆలపించు మాధుర్యం
నిదురించే కొలను అలల పులకరింత ఈ గమనం
ఎదురుచూచి అలసిసొలసి వేసారిన పూల వనం //

అదిగో ఆ సంధ్య కొమ్మ చివరంచున కోయిలమ్మ
స్వర సంగమ రాగ ఝరిన పలకరించు ఏరువాక
ఇదిగిదిగో ఈ ఉదయపు మయూఖాల తొలి తపన
 ఎదగదిలో ఒదిగిన చిగురాకుల సంబరాలు//

పవళించిన హిమ శైలబాల పెదవులపై జాలువారి
మాట్లాడని మంచుపూల స్వగతాలను  అలికి పలికి
సుతిమెత్తని పాదాల కదిలి నర్తించే గాలి కొసల 
మూగవైన కను చూపుల వినిపించే మువ్వల సడి //